Hljómar árstíðanna í Elliðaárdal – vetur

Undanfarna mánuði hafa söngkonan Heiða Árnadóttir, píanóleikarinn Tinna Þorsteinsdóttir og víóluleikarinn Guðrún Hrund Harðardóttir stundað reglulega göngutúra í Elliðaárdalnum þar sem þær hafa hlustað á hljóm árstíðanna og sótt innblástur í náttúruna. Nú bjóða þær fjölskyldum og forvitnu fólki á öllum aldri með sér í hlustunargöngu í náttúrunni sem enn klæðist vetrarbúningi, eða hvað?

Áður hafa þær boðið áheyrendum á vor- og hausttónleika í Elliðaárdalnum. Á vel völdum stoppustöðvum bjóða þær upp á lifandi tónlistarflutning sem kallast á við árniðinn, og aldrei að vita nema smáfuglar eða krummi taki þátt í að skapa hljóðmyndina.