Ingi Þór tilnefndur fyrir veiði með fötluðum börnum
Á dögunum hlaut Ingi Þór Hafsteinsson vélstjóri og síðasti stöðvarstjóri Elliðaárstöðvar tilnefningu til Hvatningaverðlauna Öryrkjabandalags Íslands fyrir frumkvæði að veiðiferðum fatlaðra barna.
Í tilnefningunni stendur. ,,Frumkvæði að veiðiferðum fatlaðra barna sem endurspeglar nútímalegar áherslur um aðgengi og stuðlar að einu samfélagið fyrir alla.”
Hvatningarverðlaun ÖBÍ árið 2022 voru veitt við hátíðlega athöfn á Grand hótel í Reykjavík í tilefni af alþjóðadegi fatlaðs fólks sem haldinn er 3. desember ár hvert.
Verðlaunin eru veitt þeim sem hafa með verkum sínum stuðlað að einu samfélagi fyrir alla og endurspegla nútímalegar áherslur um þátttöku, sjálfstæði og jafnrétti fatlaðs fólks. Markmiðið er alltaf líf til jafns við aðra.
Frá árinu 2007 hefur Ingi haft frumkvæði að því að bjóða fötluðum ungmennum að veiða í Elliðaánum. Nokkra daga í maí og júní er áin frátekin fyrir hópana og er veitt við Höfuðhyl niður að Ármótum. Það heyrir víst til undantekninga að fólk fari fisklaust heim! Meðal hópa sem hafa komið í veiði eru ungmenni frá Klettaskóla, Styrktarfélaginu Ási og Einstök börn.
Orkuveita Reykjavíkur og Stangveiðifélag Reykjavíkur láta í té veiðidaga, útvega veiðarfæri og nesti og aðstoða við veiðina.
Ingi hefur fest þessa góðu hefð í sessi og þó að hann hafi nýverið lokið starfsferli sínum hjá Orkuveitu Reykjavíkur eftir 15 ára starf þá mun hann koma keflinu á starfsfólk Elliðaárstöðvar sem mun sjá til þess að þetta verkefni haldi áfram að dafna.
Við óskum Inga innilega til hamingju með tilnefninguna!
