Undur hugmynda

• Aðgangur ókeypis
• 28. apríl 2024
• 13:00
• Sjá á korti

Staðsetning

×

Á HönnunarMars býður Elliðaárstöð til fjölskylduviðburðar þar sem lögð verður áhersla á nýsköpun, hönnunarhugsun og hugmyndaheim barna. Börn og fjölskyldur þeirra geta tekið þátt í fjölbreyttri dagskrá eða notið samveru í fallegu umhverfi Elliðaárstöðvar. Boðið verður m.a. upp á upplifunarviðburð Á Bístró með VAXA Technologies og nýsköpunarsmiðju í samstarfi við Hugmyndasmiði. Afrakstur Raftextílsmiðju sem unnin var í samstarfi við Selásskóla verður til sýnis og hægt verður að prófa sig áfram í tilraunasmiðju með rafrásir og textíl.

Formleg dagskrá hefst kl. 13:00 og stendur til kl. 16:00, en samtímis verður Rafstöðin og Heimili veitna opin gestum, „pop-up“ hönnunarverslun verður í Heimili veitna og ef veður leyfir verður vatnsleikjagarðurinn einnig opinn þar sem börn jafnt sem fullorðnir geta buslað saman.

DAGSKRÁ Elliðaárstöðvar:

13:00-16:00 // Rafstöðin, Heimili veitna og útisvæði Elliðaárstöðvar
Elliðaárstöð og Jarðhitasýningin í Hellisheiðarvirkjun leggja saman krafta sína í gömlu rafstöðinni. Gestir geta fengið stutta fræðslu um þessa einstöku byggingu sem olli straumhvörfum í rafvæðingu borgarinnar og upplifað á sama tíma náttúru Hellisheiðar sem fær að flæða tímabundið um þennan einstaka vélarsal.

Í Heimili veitna geta gestir fræðst um orkuna sem leynist inn í veggjum heimilisins og undir gólfum á einstakri upplifunarsýningu. Í anddyri Heimilisins verður pop-up hönnunarverslun þar sem gestir geta skoðað og keypt hönnunarvörur Elliðaárstöðvar, Jarðhitasýningar og annan varning, þar á meðal nýútkomna bók Hugmyndasmiða Frábær hugmynd! sem leiðir lesandann áfram í að koma hugmynd til veruleika.

Ef veður leyfir verður vatnsleikjagarðurinn opinn þar sem börn jafnt sem fullorðnir geta buslað saman. Gestir geta einnig notið fallegrar hönnunar og náttúru svæðisins eða slakað á í hengirúmum í skrúðgarðinum og hlustað á náttúruhljóð Elliðaárdals.

13: 00 – 16:00 // Rafmagnaður textíll! – Raftextílsýning og tilraunasmiðja
Í viðburðarými Elliðaárstöðvar Turninum verður sýning á raftextílverkum nemenda úr Selásskóla. Smiðjurnar eru samstarfsverkefni Elliðaárstöðvar, Selásskóla og textílhönnuðarins Emmu Shannon. Unnið var með textíl sem til fellur hjá Orkuveitunni og er í leit að nýju hlutverki. Emma verður á staðnum og býður gestum að prófa sig áfram í tilraunasmiðju.

13: 00 – 16:00 // Frá orku til fæðu
Á Bístró í samstarfi við VAXA Technologies býður upp á upplifunarviðburð fyrir fjölskyldur á HönnunarMars. Veitingavagn Á Bístró breytist í tilraunastofu á hjólum þar sem hægt verður að kynnast nýsköpun í matvælaiðnaði í gegnum bragðlaukana. VAXA Technologies er íslenskt hátæknifyrirtæki sem sérhæfir sig í ræktun smáþörunga til manneldis í Jarðhitagarði ON á Hellisheiði. Fyrirtækið hefur hannað tækni sem kallast E2F, eða „Energy to Food” sem nýtir sér umfram afurðir Hellisheiðarvirkjunar til ræktunar á næringarríkum smáþörungum. E2F-kerfið gjörbreytir hugmyndum okkar um matvælaframleiðslu og er fyrsta skrefið í átt að því að veita öllu fólki aðgang að hollri og góðri næringu án þess að ganga á auðlindir jarðarinnar.

14:00 – 16:00 // NÝSKÖPUNARSMIÐJA Hugmyndasmiða – Öll í bátana!
Á verkstæði gömlu rafstöðvarinnar verður haldin nýsköpunarsmiðja fyrir börn, sem Hugmyndasmiðir og Edda Björnsdóttir vísindamiðlari Elliðaárstöðvar leiða. Í smiðjunni fá þátttakendur verkefnið að búa til bát, þar sem unnið er bæði með náttúruleg efni og efni sem annars væri hent.

Þátttakendur fá að kynnast því hvað nýsköpun er, hvernig hægt er að nota krafta náttúrunnar í nýsköpun og hvað felst í því að vera hugmyndasmiður.

Smiðjan er byggð á samstarfi Hugmyndasmiða og Elliðaárstöðvar þar sem áhersla er lögð á skapandi fræðslu í gegnum vísindi og leik. Nánari upplýsingar um verkefnið Hugmyndasmiðir er að finna á heimasíðunni www.hugmyndasmidir.is

Virkjum ímyndunaraflið, fáum skrítnar og skemmtilegar hugmyndir og finnum lausnir. (Þú gætir undrast yfir hvert það leiðir þig).