Didda dropi vakti mikla lukku á Vísindavöku
Um síðustu helgi, laugardaginn 27. september, fylltist Laugardalshöll af lífi þegar Vísindavaka Rannís fór fram. Þar lögðu leið sína þúsundir gesta sem fengu að kynnast fjölbreyttum vísindum sem fyrirtæki, stofnanir og skólar kynntu fyrir gestum og gangandi.
Á bás Elliðaárstöðvar var beint sjónum að hringrás vatns og ferðalagi vatnsdropans sem vakti sérstaklega athygli yngri kynslóðarinnar. Boðið var upp á sögustundina Ferðalag Diddu dropa sem sló rækilega í gegn. Einnig gátu gestir leyst dulmálsráðgátu með útfjólubláu ljósi en það er einmitt sama ljósið sem notað er til að tryggja að neysluvatnið okkar sé hreint og öruggt. Útfjólubláir geislar eru orkuríkari en sýnilegt ljós og nægja til að óvirkja örverur, þannig að með því að lýsa á vatnið er það „sótthreinsað“ áður en það rennur heim til okkar.
Didda dropi stal sannarlega sviðsljósinu. Í sögunni ferðast hún um jörðina í eilífri hringrás vatnsins og staldrar við á ólíkum stöðum. Börnin lýstu uppáhaldsstöðum Diddu: sum töldu að henni þætti skemmtilegast að breytast í ský, önnur sáu fyrir sér ævintýri í vatnslögnum sem minntu á vatnsrennibraut, og enn önnur töldu að ekkert væri skemmtilegra en „fallturninn“ þegar hún steypist sem regndropi niður í Bláfjöllum.
Nýtt fræðsluefni!
Ferðalag Diddu dropa er hluti af nýju fræðsluefni Elliðaárstöðvar sem nefnist Ósýnilegt verður sýnilegt. Efnið verður til sýnis á sýningunni Hjartastrengir og vatnsæðar sem opnar í Gestastofu Elliðaárstöðvar þann 16. október næstkomandi og stendur til 30. janúar.
Unnið að aukinni vitund á mikilvægi hreins neysluvatns
Í Elliðaárstöð vinnum við að auknu orkulæsi almennings. Við fræðum fólk um heitt og kalt vatn, fráveituna, rafmagn og gagnaveituna. Nú um mundir vinnum við að aukinni vitund um mikilvægi hreins neysluvatns undir formerkjum Icewater verkefnisins – umfangsmikils samstarfsverkefnis sem styrkt er af Evrópusambandinu og leitt af Umhverfisstofnun. Markmiðið er að bæta gæði vatns á Íslandi og auka skilning almennings á mikilvægi vatnsauðlinda okkar.