Draumaheimili unglinganna í Iðnum og tækni

Á dögunum tóku krakkarnir í Iðnum og tækni áskorun okkar í Elliðaárstöð og hönnuðu sitt eigið draumaheimili. 

Ellefu nemendur úr Árbæjarskóla þurftu að beita allri þeirri þekkingu sem þau hafa viðað að sér í valgreininni Iðnir og Tækni hjá Orkuveitunni í haust.  

Sköpunarkrafturinn virkjaður

Það reyndi á sköpunarkraftinn, lausnaleit, rökhugsun og skilning þeirra á grundvallaratriðum hönnunarhugsunar verkfræðinnar við bygginguna. 

Hvaðan kemur kalda og heita vatnið? En rafmagnið?

Að sjálfsögðu þurftu þau að staðsetja húsin og sýna hvaðan kalda vatnið og heita vatnið kom að húsinu, hvaðan rafmagnið og ljósleiðarinn kom og hvernig fráveitu var háttað.  

Samstarfsverkefni OR og Árbæjarskóla

Verkefnið var lokaverkefni í valgreininni Iðnir og tækni sem Orkuveita Reykjavíkur hefur boðið 10. bekkingum í Árbæjarskóla upp á sl. 8 ár.  

Ungmenni sækja valáfanga sem hefur það markmið að vekja áhuga nemenda á iðn- og tæknistörfum og kynna þau fjölbreyttu störf og starfstækifæri sem slíkt nám hefur upp á að bjóða. Námið er fjölbreytt og byggir á fræðslu, vettvangsferðum og verklegum æfingum. Öll fyrirtæki samstæðunnar taka þátt í verkefninu og í kennara- og undirbúningshópnum eru um 40 starfsmenn. 

Vettvangsferðir og verklegar æfingar

Í haust fóru nemendur í heimsókn í Gvendarbrunna, Hellisheiðavirkjun ON, Hreinsistöð Veitna í Klettagörðum, Ljósleiðarann og að sjálfsögðu á verkstæði Veitna á Bæjarhálsi þar sem þau lærðu undirstöðuatriði í rafvirkjun, pípulagningum og stálsmíði en þau bjuggu meðal annars til lampa, brunnstiga og tengdu blöndunartæki.  

😎🥰⚒️👩🏻‍🔧👨‍🔧⚡️💧 Takk fyrir alla fræðsluna í vetur ! #veitur #on #ljósleiðarinn #or