Til baka
Fyrsta spjall í nýrri viðburðaröð: Nýsköpun & spjall
Fyrsti viðburður í nýrri viðburðaröð fór fram fyrir helgi þegar meistaranemarnir Tumi Valdimarsson og Max Greiner kynntu verkefnið sitt TENGJA.
Heimir Tryggvason fagstjóri vatnsmiðla Veitna opnaði viðburðinn en fyrir hönd TENGJA teymisins kynntu þeir Tumi og Max upphitaða bekkinn, TENGJA, sem nýtir bakvatn – vatn sem er búið að renna í gegnum ofnana okkar en inniheldur enn töluverðan varma sem annars fer til spillis. Katla Taylor og Janek Beau voru einnig hluti af teyminu en voru vant við látin á Nýsköpun & spjalli. Þau eru öll meistaranemar í Design and New Environment við Listaháskóla Íslands.
Nýsköpun & spjall er ný viðburðaröð í Elliðaárstöð en tilgangurinn er að búa til vettvang fyrir frumkvöðla og skapandi fólk til að segja frá verkefnum sínum, skapa samtal og veita innblástur.
Eftir kynningu gafst tækifæri til að spjalla, tengjast og spyrja spurninga. Vel heppnað og frábært tækifæri til að kynnast efnilegum frumkvöðlum.
Nýsköpun & spjall er mánaðarleg viðburðaröð þar sem fengnir eru frumkvöðlar og skapandi fólk til að kynna spennandi verkefni.
