Vatnsvernd – Verndum vatnið

Vatnsverndarsvæði eru lykillinn að hreinu vatni

Mikilvægt er að vatnið sem kemur úr krönunum sé hreint og ómengað því við drekkum það og það er notað í ýmiss konar matvælaframleiðslu. Vatnsbólin sem við sækjum vatnið í eru á vatnsverndarsvæði og það er mjög mikilvægt að við gætum öll varkárni í umgengni við þau. Helsta hættan er að svæðin mengist, t.d. með rusli, olíu, skólpi eða öðrum efnum því þessi efni geta komist í gegnum jarðlögin og í vatnið sem rennur neðanjarðar inn í vatnsbólin. Við þurfum líka að vernda vatnsbólin fyrir örverumengun sem getur borist með dýrum eða úr jarðvegi í leysingum. Vatnið sem við á höfuðborgarsvæðinu drekkum hefur komið alla leið úr Bláfjöllum, sem eru innan vatnsverndarsvæðis, og þarf því að fara varlega um svæðið t.d. þegar við skellum okkur á skíði. Olíuslys eða önnur mengun í Bláfjöllum eða í Heiðmörk gæti haft mjög neikvæð áhrif á gæði vatnsins sem við drekkum. Það sama á við um önnur vatnsverndarsvæði.

Vatnsból sem Veitur sækja vatn í eru á höfuðborgarsvæðinu, Suður- og Vesturlandi og eru 13 talsins. Við öflum neysluvatns í Heiðmörk (Gvendarbrunnum, Jaðri, Myllulæk og Vatnsendakrikum), við Akrafjall (Berjadalsá, Slaga og Óslækur), Seleyri norðan Hafnarfjalls, úr lindum í Hafnarfjalli, Grábrókarhrauni, Svelgsárhrauni, Grund, Fossamelum, Steindórsstöðum og Bjarnarfelli. Vatninu úr þessum vatnsbólum er dreift til yfir helming landsmanna.

Vatnsvernd – verum til fyrirmyndar!

Mikilvægt er að vatnið sem kemur úr krananum sé hreint og ómengað þegar við drekkum það. 

Við verndum vatnið með því að gæta þess að menga ekki náttúruna. Ef rusl, olía og bensín eða skólp fer í jörðina á vatnsverndarsvæðum þá getur það lekið niður í vatnið sem rennur neðanjarðar.
 

Á vatnsverndarsvæðum má því ekki keyra ökutæki og mikilvægt er að taka allt rusl með sér og ganga vel um.  

💧 Vatnið sem þú drekkur kemur úr jörðinni – hjálpumst að og verndum það.