Gufuborinn Dofri
Hvernig væri daglegt líf án hitaveitu?
Jarðhitinn er mikilvæg auðlind á Íslandi og nýting hans veitir landsmönnum mikil lífsgæði.
Gufuborinn Dofri kom til landsins árið 1957 og boraði eftir heitu vatni á lághitasvæðum og gufu á háhitasvæðum á árunum 1958-1991.
Hann var afkastamikill og hafði enginn bor borað fyrir jafn mörgum holum og hann gerði þegar hann hætti.
Það voru fá jarðhitasvæðin sem Dofri snerti ekki á. Hann var notaður á Reykjanesi, Nesjavöllum, í Eyjafirði og boraði margar holur í Kröflu. Hann boraði einnig tugi góðra hola á höfuðborgarsvæðinu og þar af 14 í Elliðaárdalnum.
Nú þegar Dofri hefur sest í helgan stein í Elliðaárstöð mun hann um ókomna framtíð minna gesti dalsins á framsýni liðinna tíma, það framfaraskref sem stigið var í loftslagsmálum með tilkomu hitaveitunnar og þau samfélagslegu lífsgæði sem hitaveitan gefur okkur allt árið um kring. Oft er sagt að Dofri sé verðmætasta vinnuvél Íslendinga en það má segja að hann hafi bjargað Reykjavík frá kolareyknum.
Vélsmiðjan VHE gerði Dofra upp. Orkuveitan, HS Orka og Landsvirkjun lögðu í sameiningu til fjármagn til verksins og verður hann til sýnis við Elliðaárstöð í Elliðaárdal.
